Formacion di gobierno nobo ta den full swing y diamars mainta, Mike Eman a bishita e edificio bandona di Bestuurskantoor, despues cu e la expresa di lo kier usa e edificio pa e proceso di formacion di e gobierno nobo.

Nos a logra drenta den e edificio pa por wak pa nos mes e deterioro di e edificio bandona aki. E edificio aki tin hopi historia su tras. E ta caminda e prome Prome Minister di Pais Aruba a cuminsa traha, sigui pa tur Prome Minister, te ora cu Sr. Nelson Oduber a dicidi di sali for di e edificio y lage bandona pa basta tempo caba.

Ta bon pa nota tambe cu den e edificio aki, Sr. G.F. Betico Croes, cu tin biaha ta jena boca di Sr. Nelson Oduber, tambe tin basta historia den e edificio aki. E edificio aki y Status Aparte tin hopi en comun. E dicon di e insistencia di laga e edificio histórico aki cay, ta keda un misterio pa un y tur na Aruba.

Ta di aprecia cu Sr. Mike Eman kier simbólicamente pone un énfasis ariba restaura nos edificionan histórico. No únicamente e historia di e edificionan ta importante, pero tambe nan valor cultural y Arkitectonico. Di nos banda nos ta spera cu den futuro Aruba por conta atrobe cu edificionan restaura, manera esun di Censo cu ta un orguyo cultural y histórico di nos pueblo.